O xoves 8 de novembro reunímonos coas asociación do concello de Monterroso para presentarlles o Plan de Animación Sociocultural que desenvolvemos na cadea. Estamos moi agradecidas polo elevado nivel de participación, xa que asistiu a Sociedade Deportiva de Monterroso, 25 Xastres, Entropía Folk, a Coral, Falcatrueiros, así como a propia corporación municipal, coa que xa nos reuníramos en anteriores ocasións.
Abordamos a necesidade de entender a prisión como un espazo máis da comunidade, ao que levar a nosa oferta cultural. Así, todas as asociacións coincidiron en que poderían ir ao centro penal a facer actuacións, obradoiros puntuais, mostras, a xogar partidos de fútbol, etc.
Resultaba un pouco máis complicado pensar nunha oferta estable no tempo, xa que a maioría das asociacións funcionan con monitoras/es contratados que dinamizan a entidade. Aínda así xurdiron propostas estables ben interesantes, como a posibilidade de facer un Club de lectura ou un grupo de teatro.
Tamén o Concello ofreceu actividades da súa oferta cultural e deportiva, como son as clases de ioga, zumba ou guitarra.
O clima foi de interese por tecer pontes entre a prisión, o Concello e as entidades do concello.
Galician 
Spanish